美食
港 STYLE 美食巡禮 の 日本篇 充滿時代感的復古小店居酒屋
港 STYLE 美食巡禮 の 日本篇 充滿時代感的復古小店居酒屋
香港人特別鍾意日本料理,呢排未翻得「第二家鄉」日本之際,唯有喺香港搵住高質和食頂住隱先。今次港Style 美食巡禮嚟到棉登徑嘅街角,搵到一間以平成年間命名嘅隱世小店。店舖門面充滿時代感,彷彿一下子穿越時光隧道,翻到八十年代嘅日本。
小店裝修簡約樸實,座位唔多,大概坐到十幾人。 而牆上亦然貼滿不同嘅日本清酒招紙,餐牌亦係手寫白紙一張,係一間充滿溫度嘅和式小店。
一如日本傳統居酒屋,牆上有衣架俾客人掛衫掛袋,十分貼心。
紫薯沙律
薯仔沙律平日食得多,紫薯沙律又試過未呢?用呢度嘅紫薯沙律作開場,就最為適合不過喇。經過醃漬嘅紫薯,口感軟滑帶點微酸,十分開胃!配上新鮮嘅三文魚籽,味道香甜、感覺清新。顏色方面,紫紅陪襯得宜,用嚟打卡夠曬特別。
三種芝士蔥蛋餅
呢度嘅鎮店招牌菜式之一,三種芝士蔥蛋餅直接用煎pan上,保證新鮮熱辣。一上檯芝士蛋香撲鼻而來,蛋餅嘅外層嫩滑、內層半生熟,熱辣辣嘅芝士仲可以拉絲,入口香濃而不漏,值得encore。
牛肉大阪燒
有別於以往食開口感軟綿嘅大阪燒,呢度嘅牛肉大阪燒迎合港人口味,每啖都係結實嘅肉感,用料十足,配搭埋酸酸甜甜嘅沙律醬同紫菜,味蕾大滿足。
月見松葉蟹蓋
呢度嘅松葉蟹蓋甲羅燒係充滿驚喜之作, 雖然一上檯發現蟹蓋比預期細隻,但十分有「內涵」:細膩香濃嘅蟹膏,陪襯半熟日式蛋黃,味道配搭得出奇地夾。
小店內仲有特製清酒容器供客人飲清酒之用,好有日本傳統居酒居嘅感覺呢。
地址:尖沙咀棉登徑8號凱譽地下17號舖
來源:港STYLE